Канадын хөгжөөн дэмжигчид АНУ-ын төрийн дууллыг олноороо эсэргүүцэн орилолдсон нь олны анхаарлыг татжээ. Учир нь АНУ-ын Ерөнхийлөгч Дональд Трамп Канадын импортод өндөр тариф ногдуулахаа зарласан билээ.
Мөн Торонто Рэпторс болон Лос Анжелес Клипперс багуудын хооронд болсон Үндэсний сагсан бөмбөгийн холбооны (NBA) тоглолтын үеэр энэ үйлдэл дахин давтагджээ.
Канадын хөгжөөн дэмжигчдийн энэхүү эсэргүүцэл нь Трампын шийдвэрт гүнээ бухимдаж буйг илэрхийлж байна. АНУ-ын хамгийн ойрын холбоотон болсон Канадын эсрэг ийм өндөр татвар ногдуулах нь Хойд Америкийн тивд урьд өмнө байгаагүй худалдааны дайн дэгдээх эрсдэлийг нэмэгдүүлж байгаа юм.
Канадаас АНУ руу орж буй бүх импортод 25 хувийн тариф, эрчим хүчний салбарт харьцангуй бага буюу 10 хувийн татвар ногдуулах тухай Трампын зарласан шийдвэр мягмар гарагаас хэрэгжиж эхлэхээр байсан ч түр зогсоогоод байна.
Үүний зэрэгцээ Трамп Канад АНУ-тай нэгдэж, 51 дэх муж болох ёстой гэсэн санаагаа дахин хөндөж, энэ нь инээдтэй санал биш гэдгийг батлан хэлсэн нь байдлыг улам хурцатгав.
Эдийн засагчдын үзэж байгаагаар, эдгээр тариф нь АНУ-ын иргэдийн хувьд бензинээс авахуулаад хүнсний бүтээгдэхүүн хүртэл өргөн хэрэглээний барааны үнийг нэмэгдүүлэх ч хамгийн их хохирол амсах тал нь Канад байх болно. Хэрэв эдгээр татвар удаан хугацаанд үргэлжилбэл Канад хүнд хэцүү эдийн засгийн уналтад орох эрсдэлтэй.
Канад даяар бухимдал нэмэгдэж, улс төрийн удирдагчдын зүгээс ч тэмцэх хүсэл эрмэлзэл улам бүр хүчээ авч байна.
“Бидний олон хүн энэ нөхцөл байдлын нөлөөнд өртөж, хүнд үе тулгарах болно. Би та бүхнийг бие биедээ тусалж, хамтдаа даван туулахыг хүсье” хэмээн Ерөнхий сайд Жастин Трюдо бямба гарагт олон нийтэд хандаж хэлжээ.
